Вежби за истегнување на цело тело
Вежбите за истегнување се многу важен дел од секоја спортска активност. Без разлика на возраста и физичката подготвеност, истегнувањето треба да биде дел од нашето секојдневие. Овие вежби се корисни за секој кој сака да ја подобри подвижноста на мускулите, колената и циркулацијата во целото тело. За да ги почувствувате придобивките, потребно е да одвоите половина час дневно.
1. ИСТЕГНУВАЊЕ НА ЛИСТОВИТЕ
Мускули кои се истегнуваат: листови на подколеница.
Кога се препорачува: после трчање или во секое време кога овие мускули ги чувствувате затегнати.
Совет: прекинете веднаш доколку почувствувате болка во ахиловата тетива, место каде се поврзува мускулот на листот со зглобот.
Како се изведува вежбата:
- Со рацете потпрете се на задниот дел од столицата или на ѕид. Ставете ги нозете една пред друга. Предното колено благо свиткајте го а задната нога исправете ја. Постепено придвижувајте го телото нанапред додека не почувствувате нежно истегнување во задната нога.
- Останете во оваа положба 30 секунди.
- Повторете ја вежбата со другата нога.
2. ДВИЖЕЊЕ НА НОЗЕТЕ
Мускули кои се истегнуваат: колкови, внатрешен и надворешен дел на бутините.
Кога се препорачува: пред вежбање.
Совет: почнете со помали движења. Како се опуштаат мускулите зголемувајте ги движењата.
Како се изведува вежбата:
- Застанете со стапалата раширени во линија на рамо.
- Балансирајте ја левата нога, додека со десната замавнувате странично.
- Направете 20 повторувања.
- Повторете со другата нога.
3. ИСТЕГНУВАЊЕ НА МУСКУЛИТЕ НА ЗАДНИОТ ДЕЛ ОД НОГАТА
Мускули кои се истегнуваат: задна ложа
Кога се препорачува: по физичка активност, пред легнување или кога мускулите се затегнати.
Совет: Ако не можете да ги допрете прстите, обидете се рацете да ги потпрете на под или на ногата.
Како се изведува вежбата:
- Седнете на мека површина, со едната нога исправена пред вас. Другата нога свиткајте ја.
- Додека го држите грбот исправен, навалете се напред и допрете ги прстите.
- Кога ќе почувствувате истегнување во задниот дел на ногата, останете во таа положба 30 секунди.
- Повторете со другата нога.
4. ИСТЕГНУВАЊЕ НА НАДКОЛЕНИЦА
Мускули кои се истегнуваат: надколеница
Кога се препорачува: по физичка активност или кога се затегнати мускулите.
Совет: нежно повлечете ја ногата, силното истегнување може да доведе до затегнатост во мускулите.
Како се изведува вежбата:
- Застанете исправено и повлечете ја десната нога кон задникот и држете ја со десната рака.
- Држете го коленото насочено надолу.
- Во оваа положба останете 30 секунди.
- Повторете со другата нога.
5. ИСТЕГНУВАЊЕ НА ЗАДНИКОТ
Мускули кои се истегнуваат: задникот и колковите
Кога се препорачува: по трчање или пред спиење.
Совет: прекинете веднаш доколку почувствувате болка во коленото, колкот или на било кое друго место.
Како се изведува вежбата:
- Легнете на грб со нозете свиткани во колена под агол од 90 степени.
- Поставете го левиот глужд преку десното колено.
- Со десната рака придвижувате ја ногата кон градите за да почувствувате истегнување во колкот на другата нога.
- Останете во оваа положба 30 секунди.
- Повторете со другата нога.
6. ИСТЕГНУВАЊЕ НА ГОРНИОТ ДЕЛ ОД ГРБОТ
Мускули кои се истегнуваат: на грбот, рамената и вратот.
Кога се препорачува: по долго седење или кога чувствувате вкочанетост во грбот.
Совет: подеднакво истегнете ги и двете страни.
Како се изведува вежбата:
- Седнете на стол со исправен грб а глуждовите да ви бидат во линија со колената.
- Свртете го телото десно а со левата рака притиснете на десната страна на столот.
- Држете 30 секунди.
- Повторете на другата страна.
7. ИСТЕГНУВАЊЕ НА ГРАДИТЕ
Мускули кои се истегнуваат: мускули на градниот кош
Кога се препорачува: после долготрајно седење.
Совет: доколку почувствувате непријатност во рамената веднаш престанете.
Како се изведува вежбата:
- Застанете на отворена врата и поставете ги подлактиците на рамката .
- Наведнете се нанапред додека не почуствувате истегнување во градите.
- Останете во оваа положба 30 секунди.
8. ИСТЕГНУВАЊЕ НА ВРАТОТ
Мускули кои се истегнуваат: на вратот
Кога се препорачува: кога седите подолг временски период или го чувствувате вратот затегнат.
Совет: нормално е едната страна да ја чувствувате позатегната од другата. Обидете се да останете подолго на страната што ја чуствувате понапната.
Како се изведува вежбата:
- Спуштете ја брадата кон градите.
- Навалете ја главата налево додека не почувствувате истегнување долж десната страна на вратот.
- Останете во оваа положба 30 до 60 секунди.
- Повторете на другата страна.