Калканеалниот израсток (израсток на пета), познат како шилец во пета, настанува од коскено ткиво. Најчесто се протега помеѓу коската на петата и медијалниот лак на стапалото. Шилецот предизвикува испакнатост на коската во долната страна на петата, кој во голем број од случаите може да се прошири напред, дури и до половина сантиметар. Овој израсток предизвикува болка во петите исто така често е поврзуван со воспаление познато како плантарен фасцитис.

Причини за настанување на шилец во пета?
Шилецот во пета е директно предизвикан од долготрајно оптоварување на мускулите и лигаментите на стапалото и подколеницата. Најчести фактори за настанување шилец во пета можат да бидат: абнормалност при одење, трчање особено на тврди површини, чевли кои немаат соодветна подршка на стапалото, како и вишок на килограми.

Кои се симптомите на шилец во пета?
Најчесто се јавува болка, а во многу ретки сличаи се јавува црвенило на петата и стапалото. Овие симптоми можат да се јават по должината на целото стапало. На крајот секако, може да се примети видлива коскена испакнатост на петата. Многу луѓе ја опишуваат болката како да згазнуваат на тврд и остар предмет веднаш штом ќе застанат наутро, а подоцна во текот на денот се претвора во досадна болка. Честопати острата болка повторно се јавува откако подолг временски период стапалото нема да е активно.

Како се лекува шилецот во пета?
Најчесто се препорачува одмор, намалена физичка активности, спорт како и ладни облоги. Користењето на ладни облоги истовремено може да помогне во намалување на отокот и болката во петите. Како дел од третманот се препорачува да се носат ортопедски влошки. Има два типа, едната е дизајнирана да го намали притисокот и воспалението на петата и влошка со отвор на пета кој има за цел да ја релаксира плантарната мускулатура, да ја намали напнатоста и преоптоварувањето на стапалото. Исто така во третманот се препорачува физикална терапија како и вежби кои служат за намалување на воспалението и болката во пета.

Вежба бр. 1

• Седнете на под со нозе исправени во колено.
• Поставете ја лентата со отпор на средина од стапалото, потоа со двете раце држете ја лентата.
• Повлекувајте ја лентата се додека не почувствувате максимално затегнување на стапалото и подколеницата
• Кога ќе почувствувате затегнување задржувате во таа положба 20-30 секунди.

Вежба бр. 2

• Застанете на полутопка или скала со болната нога, при што петата треба да виси.
• Постепено ја спуштате петата, се додека не почувствувате затегнување во стапалото.
• Кога ќе почувствувате затегнување задржувате во таа положба 20-30 секунди.
• Оваа вежба ја повторувате 4-5 пати, секако и на двете стапала

Вежба бр. 3

• Поставете крпа под ногата.
• Фатете ја крпата со вашите прсти.
• Подигнете ги прстите нагоре, но петата да ви остане на подлогата.
• Задржете ја таа позиција неколку секунди.
• Ослободете ја крпата и раширете ги прстите колку што можете повеќе.

Вежба бр. 4

• Седнете на стол, под ногата поставете масажно топче или цилиндар
• Движете ја подколенцата напред назад, ролајќи го топчето
• Повторете го истото движење неколку минути, секако и на двете нозе

Вежба бр. 5

• Застанете покрај ѕид, рацете исправени и потпрени на него
• Здравата нога ја поставувате пред болната нога
• Потоа се истегнувате без да го одвоите стапалото од подлогата
• Кога ќе почувствувате максимално затегнување на подколеницата, задржувате неколку секунди
• Оваа вежба ја повторувате ноколку пати.

Автори:
Д-р Дарко Василевски
Сашо Цветановски – физиотерапевт

За сите прашања во врска со ортопедските производи пишете ни на: sovet@medicushelp.com.mk
Нашиот стручен тим од доктор и физиотерапевт ќе ви одговорат.