×

Cart

Your cart is empty.




Вежби за корекција на подгрбавеност

Вежби за корекција на подгрбавеност

Кифозата (подгрбавено држење) се карактеризира со изразена кривина во горниот дел од `рбетот при што се формира поголема или помала грпка. Овој деформитет најчесто е придружен со промени во држењето на телото- главата и карлицата се поставени нанапред, што создава дополнителен притисок на `рбетот. Промена во положбата на главата се јавува како последица на гледање надолу подолг временски период, со што се оптоварува 'рбетот и мускулите на вратот. Со поместување на главата од само 30 степени надолу, оптоварувањето на 'рбетот е 18 килограми.

 

Сепак, во почетна фаза кифозата може успешно да се третира со помош на специјални вежби. Бидејќи кифозата е придружена со ослабени мускули на грбот потребно е да се прават вежби за зајакнување на овие мускули и за истегнување на градите. Во продолжение ви предлагаме три многу ефикасни и едноставни вежби кои ќе ви помогнат да се намали кифотичното држење и да се намалат болките во вратот и грбот.

Вежби за корекција на кифоза

'Рбетот е главниот потпорен столб на телото. Она што е важно да се нагласи е дека 'рбетот не е права линија, туку има свои природни кривини кои влијаат на оптималната распределба на тежината. Овие кривини играат важна улога во движењето на 'рбетот и во апсорпција и распределба на надворешни сили.

1. Свесна корекција

Многу е важно секојдневно со секое движење свесно да се коригира положбата на 'рбетот. Идеалното порамнување во стоечката положба е кога главата, торзото, карлицата и стапалата да се поставени точно едно над друго. Замислете права вертикална линија поставена странично во однос на телото. Во случај на правилно држење, оваа линија поминува низ следните точки:
-ушната школка
-средина на главата и рамото
-средината на карлицата
-пред глуждот

Обидете се држењето на телото да го усогласите по замислената странична линија и следете ги следните упатства:

-Стапалата се поставени паралелно на карлицата.
-Карлицата е поставена над стапалата така што нема навалување напред или назад. 
-Издолжете го `рбетот, како да сакате да го допрете таванот со скалпот.
-Рамената се отворени, а не поставени нанапред.
-Главата над рамената, а не поставена нанапред.

За дополнителна корекција и поттикнување на правилно држење, препорачуваме користење на ортози за стабилизирање на `рбетот и корекција на кифозата.

2. Веслање со ластик

Кај кифозата потребно е да се зајакнат мускулите во горниот дел од грбот, за да се намали искривувањето на `рбетот. Пред да започнете со самата вежба, важно е свесно да ги активирате овие мускули. Замислете дека помеѓу лопатките имате молив кој треба цврсто да го стиснете и да го држите додека ја изведувате вежбата.

Вежбата се изведува на следниов начин:

  • Преклопете го ластикот на средина и застанете со стапалата на него за да добиете еднаква должина од двете страни.
  • Со двете раце држете го ластикот. Свиткајте се нанапред а карлицата поместете ја назад.
  • Гледајќи настрана, карлицата треба да биде во иста линија со стапалото и тежината да биде на задниот дел од стапалото.
  • 'Рбетот треба да биде во права линија.
  • Започнете ја вежбата со повлекување на ластикот кон карлицата, лактите да бидат свиткани и да се движат покрај телотот. Потоа испружете ги рацете до почетната позиција.
  • Направете 10-15 повторувања, потоа одморете се и повторете уште две серии.
  • Најдобро е да вежбате со бенд луп ластик од 104 см.

3.       Истегнување со пилатес топка

Седнете на топката за пилатес и движете ги стапалата нанапред додека грбот не ви биде на топката (легнете на грб на топката). Опуштете ја главата и рацете поставете ги над главата и на тој начин истегнете го предниот дел од телото. За дополнителна стабилност, ставете ги рацете настрана и со прстите придржувајте се на подот. Целта на оваа вежба е да ги истегнете градните мускули и предниот дел од рамото со цел да се коригира положбата на рамото.

Останете во оваа положба 30 секунди или повеќе.

Одберете големина на пилатес топка според вашата висина. Која димензија е за вас погледнете на линкот.